Nakibahagi si Senate Minority Leader Alan Peter Cayetano sa pagdiriwang ng World Lake Day nitong Huwebes sa pamamagitan ng pagbibida sa naging malaking pag-unlad ng Laguna Lake sa lungsod ng Taguig nitong mga nakaraang taon, pati na rin ang napakalaking potensyal nito na hindi pa ganap na nagagamit.

“Nung congressman pa ako ng 1998, naging passion ko na po kung paano pagandahin ang Laguna Lake. Nagkaroon lang po siyempre ako ng opportunity sa side ng Taguig dahil nga ito ang aking home city… Napakarami po kasing gamit ng lake,” wika ni Cayetano sa dalawang livestream nitong August 27 habang nasa Taguig Lakeshore.

Ipinaalala niya na bawat tao — maging nag-aalaga man ng palaisdaan, ilog, o lawa — ay may responsibilidad na maging mabuting tagapangalaga ng mga nilikha ng Diyos.

“Ang pagiging sa gobyerno, ang pagiging public servant — hindi po kami ang may-ari ng resources… Kami po ay stewards, tagapamahala lang. Lahat ng tao kahit na wala sa gobyerno, meron po tayong obligasyon maging good stewards,” aniya.

Inilarawan ni Cayetano ang mga proyekto ng Taguig City sa lakeshore bilang konkretong paraan ng pangangalaga sa lawa. Aniya, layunin ng mga ito na protektahan ang lawa laban sa pagguho ng lupa, polusyon, at mga ilegal na tirahan, habang tinitiyak na magagamit ito ng publiko.

“Nung ginawa y’ung C6 or road dike, basically, pinoprotect po y’ung lakeshore. And part of its protection is not only na huwag mag-erode, (but para) hindi bahayan ng informal centers kasi kung mabahayan yung dumi, dito mapupunta sa lawa. The other thing is to make it for public use,” paliwanag ng senador.

Sinagot din niya ang mga paratang tungkol sa pangangamkam ng lupa. Taliwas sa alegasyong ang lokal na pamahalaan ay nang-agaw ng mga lupa, sinabi ni Cayetano na naglaan pa ito ng mga lugar para mapakinabangan ng publiko.

“May allegations na may kinakamkam kami. Hindi ko lang alam kung pag sinabing kami, kung kaming mga Cayetano, kung ako, o kami ng ibang leaders… Doon sa bandang gitna, marami na pong private (land) kasi may 1,100 hectares ng lupa na nasa labas ng road dike. Meron po doon na private property, merong gobyerno,” wika ng senador.

“Pero ito lahat po, precisely ni-reserve at ginawan ng paraan ng local government na maging public para hindi kamkamin. So baliktad sa allegation na kinakamkam. Titingnan niyo po y’ung history. Maraming kumakamkam po ng lupa dito. Pero ang history po ng Cayetano ay tumutulong na maging good stewards para sa gobyerno,” giit pa niya.

Nanawagan din ang senador sa Laguna Lake Development Authority (LLDA) na mas seryosohin ang tungkulin nitong pangalagaan ang lawa at manguna sa pagdiriwang ng World Lake Day.

Binigyang diin niya na ang pangangalaga sa lawa ay nagsisimula sa paggalang dito bilang biyayang mula sa Diyos.

“Baka naman dapat ang LLDA at iba pang mga namamahala sa lawa ay nagse-celebrate kasi parang second year na ito na Taguig pa ang nagse-celebrate ng World Lake Day. Baka nakaligtaan lang … But syempre, kung ikaw ay mismo ang trabaho mo ay sa lake, dapat naman siguro, diba?” sabi ng senador.

“That’s why Taguig as a city, kami as legislators, mga konsehal, mga kapitan namin na may kinalaman sa lake, we’re all trying to do our part na maging mas productive po ang lake. But magsisimula po iyan sa pangangalaga, sa pamamahala. Meaning, dapat walang polluted at dapat nirerespeto na ito ay gift at gawa ng Panginoon,” dagdag niya.